Super menniskju á dagstovnaøkinum

Føroya Pedagogfelag metir, at ein lógarfestur normeringslykil við greiðum leiðsti fyri, hvussu játtanir til dagstovnar skulu umsitast, er alneyðugur.

Fíggjarleisturin hjá Tórshavnar kommunu gruggar veruligu støðuna á dagstovnaøkinum. Hóast undanfarna samgonga tvíhelt um, at tey høvdu hækkað normeringina, so er veruleikin á dagstovnaøkinum tann, at økið bløðir.

Tølini tala fyri seg

Um ein hyggur eftir, hvussu nogv ársverk/starvsfolk Tórshavnar kommuna hevur í starvi á dagstovnaøkinum, og samanber við økta barnatalið sama tíðarskeið sæst skjótt, at fíggingin als ikki fylgir tørvinum, men heldur verða stórar sparingar framdar.

Ár	2017	2018	2019	2020	2021
Børn p.r. á.v.	6,81	6,37	6,74	7,67	8,21

Í 2017 vóru í miðal 6,81 børn fyri hvørt ársverk á dagstovnunum í Tórshavnar kommunu. Í fíggjarætlanini, sum Tórshavnar kommuna hevur lagt fyri í 2021 síggja vit, at barnatalið fyri hvørt ársverk nú er hækkað til 8,21 børn. Ein øking á 1,4 barn fyri hvørt ársverk í mun til 2017.

Undanfarna býráð í Tórshavnar kommunu, hevur ikki gjørt sítt arbeiði nóg væl, men hevur verði við til at niðurraðfesta økið. Hóast hetta í orð og talu ikki var ætlanin.

Orsøkin finnist helst í fíggjarleistinum við miðaltølum hjá kommununi. Ein leistur, íð púra skeiklar økið.

Raðfestingar skulu til

Hesi tøl siga eina søgu um eina gongd. Í dag verður alt ov nógv kravt av verandi starvsfólki. Eitt krav um, at tey eru super menniskju – tað eru tey so eisini – men, tey eru eisini byrjað at ríma av dagstovnaøkinum, í onnur størv. Tað síggja vit longu, at námsfrøðingarnir so smátt eru farnir at gera.